GAUTENG. – Willie Aucamp, die minister van landbou, het ‘n skikking verwelkom wat bereik is ná onderhandelinge oor die bestuur van die bek-en-klouseer-uitbreking.
Die departement van landbou sê die ooreenkoms is Donderdag in Pretoria tussen dié departement, Sakeliga, die landnou-organisasie Saai, Vrystaat Landbou en ander rolspelers bereik. Volgens Aucamp sal die skikking groter stabiliteit in die landboubedryf bring. Dit maak ook voorsiening daarvoor dat eienaars van diere met gesplete hoewe hul vee vrywillig teen bek-en-klouseer kan inent, mits die voorgeskrewe biosekuriteitsmaatreëls nagekom word.
Hy sê die departement en Onderstepoort Biological Products (OBP) het hul uitsluitende reg op die invoer en verspreiding van bek-en-klouseer-entstof prysgegee om die private sektor in staat te stel om entstof op groter skaal in te voer. Volgens die departement sal die fokus nou op die implementering van die ooreengekome maatreëls val.
