Die departement van binnelandse sake het amptelik sy nuwe digitale vennootskapsmodel met die banksektor van stapel gestuur. In plaas daarvan om lang afstande te reis en ure in rye te staan, kan Suid-Afrikaners nou binne vyf tot tien minute ’n veilige Smart ID-aansoek by hul plaaslike banktak voltooi.
Die DA sê op sosiale media: “Ontmoet die toekoms, waar Smart ID-aanwysings net 5–10 minute neem! Jy kan nou by deelnemende banktakke aansoek doen, en 17 takke word hierdie week bekendgestel. Dit bring ’n nuwe era waarin Binnelandse Sake-dienste nader aan jou beweeg onder die leierskap van DA-minister, dr. Schreiber. Geen papierwerk, geen lang toue – ’n vinnige, veilige en volledige digitale proses.”
Luidens ‘n verklaring deur binnelandse sake vorm die model deel van die “Home Affairs @ home”-program wat digitale transformasie gebruik om landsburgers vinniger en doeltreffender toegang tot identiteits- en ander dienste te gee. Dit sluit ook die bestaande tegnologiese integrasie tussen binnelandse sake en banke, die Online Verification Service, in, wat die aantal veilige dienspunte landwyd uitbrei. Nege takke van Capitec en Standard Bank is reeds in werking, met nog 17 takke teen die einde van die week. Eerste Nasionale Bank is besig met finale toetse, terwyl ander banke wat verlede jaar by die program aangesluit het, in verskillende fases van ontwikkeling is. Die nuwe model gebruik digitale API wat direk met binnelandse sake verbind is. Dit beteken aansoekers kan sonder ‘n afspraak of enige papierwerk hulle Smart ID-aansoek binne vyf tot tien minute voltooi. Hierdie diens sal in die komende jaar na meer banktakke uitgebrei word, met planne om teen 2029 sowat1 000 takke landwyd aan boord te hê.
Die eerste fase fokus op SA-burgers en permanente inwoners wat nog hul groen ID-boeke het, sowel as heruitgawes vir bestaande Smart ID-houers. Ongeveer 16 miljoen mense gebruik steeds die groen ID, wat baie vatbaar is vir bedrog. Die vinniger oorgang na die Smart ID help om identiteitsbedrog te bekamp.
Dr. Leon Schreiber, minister van binnelandse sake, sê die nuwe model beteken dat dienste na die mense toe kom, wat toegang, inklusiwiteit en waardigheid verbeter.
Die eerste takke waar burgers hul groen ID kan omskakel na die Smart ID of heruitgawes kan kry, is:
Capitec
- Orange Farm, Eyethu Mall
- Howick
- Swellendam
- Sandton City
- Kathu Village Mall
- Matoks
- Hermanus
- Jeffreys Bay, Fountains Mall (Vrydag)
- Pietermaritzburg (Vrydag)
- Tygervallei (Vrydag)
- Stellenbosch (Vrydag)
- Vredenburg (Vrydag)
- Kaapstad V&A (Vrydag)
Standard Bank
- Soweto, Maponya Mall
- Rosebank
- Westgate Mall (Donderdag)
- Parow (Donderdag)
Druk hier om meer te lees.
