NEW YORK. – Die burgemeester van New York, Zohran Mamdani, het die meeste reis in die land se grootste stad van 21:00 Sondag tot 12:00 Maandag verbied – ’n buitengewone maatreël wat die erns van ’n historiese sneeustorm in die streek weerspieël.
Volgens Mamdani het dele van die stad tot 48.26 cm sneeu ontvang (19 duim). Amptenare waarsku dat die storm onder die 10 ergstes in die stad se 150-jarige geskiedenis kan tel.
Volgens CNN het Mamdani ook Maandag klasse by die stad se openbare skole gekanselleer.
Die naderende weerstelsel is Mamdani se tweede groot uitdaging met ekstreme weerstoestande sedert hy op Nuwejaarsdag as burgemeester ingehuldig is. Die 34-jarige se besluite – en hoe dit die 8.5 miljoen inwoners van die stad raak – word noukeurig dopgehou deur sowel ondersteuners as kritici.
’n Hoë-impak “bom-sikloon” begin intussen uit New England beweeg nadat dit in sommige deelstate tot meer as 91 cm sneeu (3 voet) tot gevolg gehad het en honderde duisende mense sonder krag gelaat het. Sowat 40 miljoen mense was Maandag onder sneeustormwaarskuwings.
Meer as 76 cm sneeu (30 duim) het reeds geval, met sowat 70 cm (2 voet) wat in minstens vyf deelstate aangemeld is. Dit is die grootste sneeustorm nóg vir Providence, en die ergste in jare vir Philadelphia – terwyl sneeu steeds val.
Gevaarlike toestande het openbare vervoer tot stilstand gebring en inwoners is gemaan om van die paaie af weg te bly. Meer as 10 000 vlugte is volgens FlightAware gekanselleer. Sommige reisverbodbepalings is Maandagaand begin verslap.
