GAUTENG. – Die Spesiale Ondersoekeenheid (SOE) het Dinsdag op die kantore van die Reguleringsowerheid vir die Privateveiligheidsbedryf (Psira) in Centurion, Pretoria, toegeslaan in verband met ’n ondersoek na ’n opleidingskontrak ter waarde van sowat R130 miljoen.
Selby Makgotho, woordvoerder vir die SOE, sê die Spesiale Tribunaal het op 17 September ’n deursoek-en-beslagleggingslasbrief toegestaan. Die SOE het die operasie met die hulp van die Valke uitgevoer. Die ondersoek volg op Proklamasie 316 van 2026, wat president Cyril Ramaphosa op 3 Junie 2026 onderteken het.
Selby Makgotho, woordvoerder van die SOE, sê die eenheid het Psira versoek om dokumente oor die verkryging of kontraktering van opleidingsdienste deur of namens Psira en die Werkloosheidsversekeringsfonds (WVF) te verskaf. Dit hou verband met verkiesingswaarnemeropleiding, opleiding in rekenaarvaardighede en Psira-graad E-tot-C-opleiding vir 7 071 geteikende leerders in nege provinsies. Psira het volgens die SOE slegs gedeeltelik aan die versoek voldoen en ’n jaar se dokumente wat vir die ondersoek nodig is, ontbreek. Die SOE het daarom besluit om ’n deursoek-en-beslagleggingslasbrief te bekom om onder meer op dokumente, selfone en rekenaars beslag te lê. Die eenheid sê sulke optrede word as ’n laaste uitweg gebruik nadat pogings om volledige samewerking te verkry, nie geslaag het nie.
Die SOE het ingevolge die Wet op Spesiale Ondersoekeenhede en Spesiale Tribunale 74 van 1996 die bevoegdheid om onder meer bankstate en selfoonrekords te bekom, bewyse te deursoek en daarop beslag te lê en getuies onder eed te ondervra. Die eenheid kan ook siviele stappe in die Hooggeregshof of Spesiale Tribunaal instel indien korrupsie, bedrog of wanadministrasie tydens die ondersoek aan die lig kom. Enige bewyse wat op moontlike strafbare gedrag dui, sal volgens die SOE na die Nasionale Vervolgingsgesag (NVG) verwys word vir verdere optrede.
