MADRID. – Spanje het sy lugruim gesluit vir Amerikaanse vliegtuie wat betrokke is by aanvalle op Iran, het die land se minister van verdediging, Margarita Robles, Maandag bevestig.
Die besluit, wat aanvanklik deur die koerant El País berig is, volg kort op Madrid se aankondiging dat die Verenigde State nie gesamentlik bestuurde militêre basisse in Spanje vir operasies rakende die oorlog in Iran mag gebruik nie.
Volgens BBC News het Robles gesê Spanje sal nie die gebruik van die Morón- en Rota-basisse vir enige optrede wat met die konflik verband hou, goedkeur nie. Sy het bygevoeg dat dié standpunt van die begin af duidelik aan die Amerikaanse regering oorgedra is.
Die minister van buitelandse sake, José Manuel Albares, het gesê die doel van die besluit is om niks te doen wat ’n verdere eskalasie van die oorlog kan aanmoedig nie.
’n Amptenaar van die Withuis het egter aan die BBC gesê die Amerikaanse weermag bereik reeds sy doelwitte onder Operasie Epic Fury en het nie hulp van Spanje of enige ander land nodig nie. Die Amerikaanse president, Donald Trump, het voorheen gedreig om ’n volledige handelsboikot teen Spanje in te stel weens Madrid se teenkanting teen die oorlog in Iran.
Sedert die uitbreek van die konflik laat in Februarie was die Spaanse eerste minister, Pedro Sánchez, een van die felste kritici van die Amerikaanse en Israeliese aanvalle op Iran, wat hy as “roekeloos” en “onwettig” beskryf het.
Bronne: BBC News, El País
