GAUTENG. – Wat ’n rustige Maandagmiddag op die gholfbaan moes wees, het in ’n ernstige voorval ontaard toe verdagtes glo in helder daglig op spelers toegesak en hulle met vuurwapens beroof het.
Luidens ‘n verklaring deur Pretoria-gholfklub het ‘n gewapende rooftog op die gholfbaan in Pretoria-Wes plaasgevind toe twee verdagtes die baan betree en spelers gekonfronteer het en geld en selfone geëis het. Die situasie het vinnig geëskaleer toe een van die spelers glo ’n vuurwapen tevoorskyn gebring en op een van die verdagtes geskiet het, waarna die tweede verdagte van die toneel gevlug het. Die gewonde verdagte is na ‘n hospitaal geneem. Ondersoeke duur voort terwyl die polisie steeds na die voortvlugtende verdagte soek.
Die gholfklub het intussen lede en besoekers verseker dat die veiligheid van alle persone op die gholfbaan hulle hoogste prioriteit is. Veiligheidsdienste is hersien en versterk waar nodig.
Volgens Kapt. Johan van Dyk, distrik-polisiewoordvoerder, word ‘n saak van poging tot moord ondersoek. Twee mans het glo die gholfbaan betree en mense met ’n vuurwapen gedreig. Een van die persone op die baan het toe glo ’n vuurwapen uitgehaal en een van die verdagtes geskiet, waarna die tweede verdagte van die toneel gevlug het. Die gewonde verdagte is met ’n ambulans hospitaal toe geneem. Die polisie het op die toneel opgedaag, maar die beseerde persoon was reeds verwyder. Geen inhegtenisnemings is op die toneel gemaak nie en ondersoeke duur voort.
Bronne: Pretoria Golf Klub en Crime Busters-Zondi Patrol
