WES-KAAP. – Die Stad Kaapstad het Sondag begin om groot getalle Zimbabwiërs wat tans buite hul land se konsulaat in Distrik Ses saamtrek, na ‘n ander plek te verskuif. Die proses het om 09:00 in samewerking met die departement van binnelandse sake en die Zimbabwiese konsulaat begin.
Raadslid Francine Higham, burgemeesterskomiteelid vir gemeenskapsdienste en gesondheid, het gesê sy het talle boodskappe van bekommerde inwoners ontvang oor die situasie by die konsulaat en dat dit wys hoeveel Kaapstadse mense omgee oor wat daar aangaan. Die Zimbabwiërs is na die binnelandse sake-repatriasiesentrum in Epping geneem, by Grenvillelaan 1, naby Gunners Circle. Dis die fasiliteit wat spesiaal opgerig is om mense wat vrywillig wil teruggaan Zimbabwe toe, behoorlik te help. Niemand moet na die konsulaat self gaan as hulle repatriasie wil aanvra nie, dit word nie daar verwerk nie. Epping is die enigste plek waar dit gedoen word, voordat mense daarna na Beitbrug vervoer word.
Die Stad se veiligheidspersoneel was ten tye van die verskuiwing teenwoordig om orde te handhaaf, terwyl die verkeers- en skoonmaakdepartement gesorg het dat toegangspaaie oop bly en die gebied skoon gehou word. Die Stad het ook erkenning gegee aan die humanitêre organisasies wat reeds op die grond werk om hulp te verleen.
Raadslid Higham het ook duidelik gemaak dat xenofobie, intimidasie, teistering en geweld nooit in Suid-Afrika geduld sal word nie. Sy het erken dat Suid-Afrikaners wel die reg het om oor sake soos immigrasie, misdaad, werksgeleenthede en druk op dienste te kla en dat hierdie kommer aangehoor moet word, maar sy het gewaarsku dat niemand die reg het om gesinne te dreig, sakepersele te teiken, mense op straat te dwing om dokumente te wys, toegang tot dienste te blokkeer of self wette te begin afdwing nie.
In ‘n noodgeval kan 07 vanaf ‘n vaste lyn of 021 480 7700 vanaf ‘n selfoon gebel word. Misdaad moet by die polisie aangemeld word. Die Stad het gesê hulle bly daartoe verbind om die proses veilig, wetlik en menswaardig te hou, en dat elke persoon in Kaapstad die reg het om sonder vrees te lewe.
