KAAPSTAD. – Die Suid-Afrikaanse Kinderhuis in Tuine, Kaapstad, vier vanjaar ’n besondere mylpaal: 218 jaar van omgee, versorging en ondersteuning van kwesbare kinders.
Die Kinderhuis, wat in 1808 gestig is, was die eerste welsynsinstelling in Suid-Afrika. Vir meer as twee eeue is dit al ’n veilige hawe vir kinders wat sorg, stabiliteit en ondersteuning nodig het.
Suid-Afrikaanse Kinderhuis brei uit
Vandag gaan hierdie werk steeds voort. Die Kinderhuis het onlangs sy kapasiteit van 44 na 50 kinders verhoog om meer kinders in nood te kan akkommodeer. Die ouderdomsperk is ook van 6 na 5 jaar verlaag, wat beteken dat die Kinderhuis nou ook jonger kinders kan ondersteun wat ’n veilige en stabiele omgewing nodig het.
Die Kinderhuis versorg kinders tussen die ouderdomme van 5 en 18 jaar en bied veel meer as net ’n plek om te woon. Dit is ’n plek waar kinders veilig kan voel, ondersteuning ontvang, skool kan bywoon, hul talente kan ontwikkel en aan ’n positiewe toekoms kan bou.
Meer kinders, groter behoeftes
Met die uitbreiding kom daar egter ook groter verantwoordelikhede en groter behoeftes. Meer kinders beteken meer kos, klere, skoolbenodigdhede, persoonlike versorgingsprodukte, opvoedkundige ondersteuning en daaglikse uitgawes.
Daarom doen die Suid-Afrikaanse Kinderhuis ’n beroep op die gemeenskap om betrokke te raak.
Individue, besighede, skole, kerke en gemeenskapsorganisasies kan almal ’n rol speel. Ondersteuning kan die vorm aanneem van finansiële skenkings, kos en ander noodsaaklike items, skoolbenodigdhede, klere, vrywillige hulp of langtermynvennootskappe.
Elke bydrae help om te verseker dat die kinders die sorg, stabiliteit en geleenthede ontvang wat hulle nodig het.
Wil jy die Suid-Afrikaanse Kinderhuis help?
As jy, jou besigheid of organisasie die Kinderhuis wil ondersteun, of ’n moontlike skenking, vennootskap of gemeenskapsinisiatief wil bespreek, kontak:
Nina Crawford, fondsinsamelaar
E-pos: [email protected]
Selfoon: 071 679 3136
Kantoor: 021 423 1328
Die Kinderhuis se 218-jarige geskiedenis is ’n verhaal van diens, volharding en hoop. Met die gemeenskap se steun kan dit voortgaan om ’n veilige plek te bied waar kinders kan groei, ontwikkel en aan ’n beter toekoms kan bou.
Lees ook: Meer persverklarings op Nuusflits
