Tollie Parton, die fopdosskarakter van die skrywer en verhoogkunstenaar Wynand Kotze, bring haar nuwe produksie, Tottie en nie verder nie, op Vrydag 21 Augustus na die Theatre of Marcellus by Emperors Palace. Die vertoning begin om 19:00.
Die produksie dra ‘n 18-jaar-ouderdomsbeperking en word nie vir sensitiewe kykers aanbeveel nie.
Terug op openbare aanvraag
Lefra Produksies bied die vertoning aan. Volgens die produksiehuis het Parton se vorige opvoering in dieselfde teater heeltemal uitverkoop en moes talle mense onverrigter sake omdraai.
Die teks is deur Kotze en Anne Hirsch geskryf. Loki Rothman het die musiek behartig.
Wie is Tollie Parton?
Kotze, ‘n voormalige hoofseun van Vanrhynsdorp, het as teaterstudent en skrywer begin, maar soos baie kunstenaars moes hy sy eie verhoog skep. Hy het in 2020 aanlyn begin optree en sy profiel het binne ses maande tot 110 000 volgelinge gegroei.
Ander beskryf hom as “reguit” en “snaaks”. Hy beskryf homself as “gay” en “voorbarig”. Hy is ‘n plattelander met ‘n liefde vir gemmerkoekies, vinnig op sy mondwerk en welbelese.
Waaroor gaan die stuk?
Parton is die té eerlike vriendin wat mense gereeld kwaad maak en al jare vertel sy is vir niks en niemand bang nie. In die nuwe produksie word daardie aanspraak getoets, en sy kan nie help om die waarheid te laat glip nie.
Kaartjies
Kaartjies is by LTickets beskikbaar. Navrae kan na 011 815 3000 gerig word.
*Persverklaring
