Transnet Port Terminals (TPT) het by die Nasionale Tesourie aansoek gedoen om sewe maatskappye te swartlys weens ernstige onetiese en onwettige gedrag.
Volgens Transnet het forensiese ondersoeke, met die ondersteuning van die Spesiale Ondersoekeenheid (SOE), verskeie ongerymdhede blootgelê. Dit sluit in finansiële wanbestuur, omkopery, diefstal van bates, samewerking en die indiening van vals inligting.
Ayanda Shezi, Transnet se woordvoerder, sê dat tugstappe ook reeds begin het teen werknemers wat oor die jare met hierdie maatskappye saamgespan het. Die maatskappye op die swartlys sal in die toekoms verbied word om enige sake met Transnet te doen.
Bron: SABC Nuus
