WASHINGTON. – President Donald Trump het Maandag gesê Amerikaanse militêre operasies in Iran sal binnekort tot ’n einde kom, en het daarmee markte probeer gerusstel wat in chaos gedompel is deur ’n oorlog wat steeds deur die Midde-Ooste weergalm.
Volgens Al Jazeera het Trump tydens ’n mediakonferensie in Florida beweer dat die VSA en Israel reeds 5 000 teikens getref het sedert die oorlog op 28 Februarie begin het toe Iran se opperleier, ajatolla Ali Khamenei, gedood is. “Dit gaan binnekort beëindig word, en as dit weer begin, sal hulle selfs harder getref word,” het Trump gesê, nadat hy vroeër aan wetgewers gesê het die militêre veldtog sal ’n “korttermyn-operasie” wees.
Die konflik het Maandag wêreldmarkte laat tuimel en oliepryse laat styg nadat Teheran, onder sy nuwe leier Mojtaba Khamenei (56), ’n nuwe spervuur missiele op sy Golfbure afgevuur het en aangedui het dat die strategiese Straat van Hormuz waarskynlik gesluit sal bly.
Oliepryse het egter later weer skerp gedaal – met soveel as vyf persent – ’n dag nadat die prys van maatstaf-ruolie tot meer as $100 per vat opgeskiet het, die hoogste vlak sedert Rusland se inval in Oekraïne in 2022.
Iran se Rewolusionêre Wagte het egter Dinsdag gereageer en gesê dat hulle – en nie die Amerikaners nie – sal bepaal wanneer die oorlog eindig.
Bronne: eNCA, Al Jazeera
