TUINROETE WES-KAAP. – Die direkteur van openbare vervolging het die adjunkburgemeester van Bitou-munisipaliteit, Nokuzola Kolwapi, formeel aangekla. Dit volg nadat ’n video in Desember verlede jaar viraal geraak het. In die beeldmateriaal kan gesien word hoe sy ’n vuurwapen in ’n openbare plek afvuur.
In ’n tweede video wat ook aanlyn versprei is, gee Kolwapi glo die vuurwapen aan haar lyfwag nadat verskeie skote afgevuur is. Na bewering het die voorval in KwaNokuthula plaasgevind tydens ’n viering van Kolwapi se seun se tuiskoms ná sy inisiasie.
Die besluit om voort te gaan met die aanklagte is deur ActionSA in die Tuinroete verwelkom.
“Hierdie besluit dui daarop dat niemand in Suid-Afrika bo die reg staan nie. As ActionSA beywer ons ons vir deursigtige en verantwoordbare regering, en dit strook met ons kernbeginsels,” het die party se voorsitter in die streek, Patrick Fepiwe, gesê.
Luidens verslae het Kolwapi ná die insident in ’n verklaring ontken dat ’n regte vuurwapen gebruik is. Kolwapi beweer dat die voorwerp in die video ’n speelgoedwapen was.
Die saak sal na verwagting voortgaan sodra ’n hofdatum bevestig is.
Bron: SABC Nuus
