TURKYE. – ’n Eggenoot se betrokkenheid, bv. likes, op ander vroue se sosialemediaplasings, kan as gedrag beskou word wat vertroue binne ’n huwelik ondermyn en in egskeidingsverrigtinge in ag geneem kan word. Dié beslissing is deur Turkye se hoogste appèlhof, die Hof van Cassasie (Yargıtay), gemaak.
Die uitspraak spruit uit ’n egskeidingsaak waarin ’n man se volgehoue “likes” en interaksies met ander vroue se foto’s op sosiale media as bewys aangevoer is dat hy sy huweliksverpligtinge geskend het. Die hof het bevind dat digitale optrede nie losstaande van werklike gedrag is nie en dat dit ’n rol kan speel wanneer skuld in ’n egskeiding bepaal word.
Volgens berigte het die tweede siviele kamer van die hof van Cassasie bevind dat sulke aanlyn gedrag as vertrouensondermynend beskou kan word en dus as grond vir egskeiding kan dien. Die beslissing beteken nie dat die gedrag strafregtelik vervolgbaar is nie, maar skep wel ’n regspresedent vir siviele egskeidingsake. Daar is beklemtoon dat herhalende digitale interaksies, wanneer dit binne die konteks van ’n huwelik plaasvind, as deel van ’n gedragspatroon geëvalueer kan word.
Bronne: Haberler.com, Greek Reporter, news.com.au, News of Bahrain
