NOORDWES. – Armand Smit en Theunis Holtzhausen, gr. 8-leerlinge van Hoërskool Wagpos in Brits, is ernstig beseer nadat hulle Sondag in ’n ongeluk met ’n vierwielmotorfiets en ’n bakkie betrokke was.
Volgens die skool was die twee leerlinge saam op die vierwielmotorfiets toe die botsing plaasgevind het. Armand is in Mediclinic Brits opgeneem, terwyl Theunis per helikopter van Mediclinic Brits na Mediclinic Sandton vervoer is vir verdere mediese behandeling.
Die skool het gesê sy gemeenskap bid vir die twee leerlinge se spoedige en volkome herstel en dink ook aan hul ouers, families en geliefdes.
Hartbeespoort Emergency Medical Services sê sy ambulans, asook die brand-en-reddingspan het Sondag die ongeluk waarby ’n bakkie en ’n vierwielmotorfiets betrokke was, bygewoon. Twee kinders is in die ongeluk beseer en is op die toneel behandel voordat hulle na ’n hospitaal in Brits vervoer is. Een van die kinders is later per lugambulans na ’n hospitaal in Johannesburg gevlieg vir verdere mediese behandeling. Die diens het motorfiets- en vierwielmotorfietsryers, veral kinders, herinner aan die belangrikheid van ’n behoorlik passende valhelm en die gebruik van die nodige beskermende toerusting.
