GAUTENG. – Die Valke het Dinsdag chemikalieë en wasmiddels ter waarde van miljoene rande by Windmill Park- informele nedersetting in Boksburg in beslag geneem.
Kol. Katlego Mogale, Valke-woordvoerder, sê in ‘n verklaring die beslaglegging volg op inligting van ’n handelsmerk-eienaar oor ’n vermoedelike onwettige fabriek wat wasmiddels en skuimbaddprodukte vervaardig. Met aankoms op die perseel het beamptes groot hoeveelhede chemikalieë en produkte gevind, insluitend bleikmiddel, wasgoedversagter, skottelgoedseep, badskuim en roomreiniger met ammoniak as basis. Die produkte is vermoedelik in 200 liter-houers gemeng en herverpak in hergebruikte houers met handelsmerketikette van bekende handelsmerke soos Unilever en Colgate-Palmolive. Daar is op chemikalieë beslag gelê wat in die algemeen vir die vervaardiging van seep en wasmiddels gebruik word. Houers wat nog nie skoongemaak was nie en weer gebruik sou word vir herverpakking is ook gevind.
Al die produkte en chemikalieë sal forensies ondersoek word om te bepaal of dit vervals is en om vas te stel watter wette oortree is.
Die ondersoek duur voort.
