OOS-KAAP. – ’n 41-jarige man van Bangladesj is verlede Donderdag in hegtenis geneem nadat die Valke op ’n beweerde onwettige medisynebedryf in KuGompo toegeslaan het.
AO Ndiphiwe Mhlakuvana, Valke-woordvoerder, sê die inhegtenisneming spruit uit ’n deeglike ondersoek deur die Saneb, wat deel vorm van die Valke se eenheid vir ernstige georganiseerde misdaad. Volgens hom het ’n intelligensie-gedrewe operasie gelei tot ’n klopjag by ’n mini-supermark in Dorchester Heights, waar die verdagte glo sonder wettige toestemming en lisensies medikasie aan kliënte verkoop het.
Einde Maart het beamptes ’n beheerde aankoop gedoen van tablette wat later ontleed is. Daar is bevestig dat die pille geskeduleerde medisyne is wat slegs deur bevoegde mediese personeel voorsien mag word. Die polisie het daarna verdere ondersoeke en aankope gedoen om die inligting te staaf.
Tydens ’n opvolgoperasie op 21 Mei is verskeie middels gekonfiskeer, insluitend Alprazolam-, Adco-Dol- en Stilpane-tablette, asook ander onbekende pille. Die verdagte is aangekla van die onwettige besit en verkoop van medisyne ingevolge toepaslike wetgewing en het dienooreenkomstig in die hof verskyn.
