KWAZULU-NATAL. – ’n Veiligheidsbeampte is Sondagmiddag in Umbilo, Durban, dood nadat hy verskeie kere in Rick Turnerweg, naby Bellairweg, geskiet is.
Garrith Jamieson van ALS Paramedics, sê verskeie ambulans- en gevorderde lewensondersteuningseenhede is kort voor 16:30 na die toneel ontbied nadat oproepe vir mediese hulp ontvang is. Paramedici het die beampte, wat vermoedelik in sy 20’s was, met ernstige skietwonde aangetref. Hy het op die toneel ‘n hartstilstand ervaar. Ondanks ’n uitgebreide poging om hom te resussiteer, was sy beserings te ernstig en is hy dood verklaar.
Die toneel is deur die polisie afgesper. Die presiese omstandighede van die skietery is nog onbekend en word ondersoek.
Patron Shield Security het intussen bevestig dat die oorledene Siyabonga Mkhize is. Die maatskappy het hom as ’n toegewyde en professionele veiligheidsbeampte beskryf wat sy werk met moed en toewyding verrig het. Volgens die veiligheidsmaatskappy het Mkhize sy gemeenskap met toewyding gedien en die veiligheid van ander telkens eerste gestel. Sy kollegas het hul medelye aan sy familie en vriende betuig en gesê sy diens en opoffering sal nie vergeet word nie. Patron Shield Security het alle eerste-reaksiepersoneel en veiligheidsmaatskappye wat by die toneel gehelp het, bedank.
Bron: ALS Paramedics
