LIMPOPO. – ‘n Man (27), wat vermoedelik probeer het om uit Limpopo te vlug, is Maandagoggend in hegtenis geneem, nadat die blitspatrollie en Banderlierkop-polisiebeamptes die bus waarop hy gery het, op die N1 Suid naby Polokwane onderskep het.
Volgens polisiewoordvoerder, kol. Malesela Ledwaba, het beamptes van die blitspatrollie tydens roetine-operasionele pligte ‘n versoek van Banderlierkop-polisie ontvang om ‘n bus wat rigting Gauteng op pad was, te onderskep. Die bus is opgespoor en die verdagte positief geïdentifiseer, waarna hy deur beamptes deursoek is. Koper, wat vermoedelik gesteel was, is by hom gevind en hy is onmiddellik gearresteer. Die verdagte word van huisroof, aanranding met die opset om ernstige liggaamlike besering te veroorsaak en die besit van vermoedelik gesteelde eiendom aagekla.
Hy sal binnekort in die plaaslike landdroshof verskyn. Die polisie se ondersoek duur voort.
