GAUTENG. – Een van drie verdagtes, in wetstoepassingsposisies, is in hegtenis geneem vir die beweerde onwettige beslaglegging op en diefstal van edelstene ter waarde van byna R15 miljoen uit ‘n woning in Killarney, Johannesburg. Ondersoekers soek na nog twee verdagtes wat met die saak verbind word.
Drie inhegtenisnemingslasbriewe moes Vrydag uitgevoer word. Terwyl ‘n verdagte vandag teen 12:30 agter tralies was, kon twee nie reeds Vrydagaand opgespoor word nie. Die verdagtes staan op aanklagte van korrupsie tereg. Buiten die twee gesoekte verdagtes sal nog twee verdagtes na verwagting in die komende weke in hegtenis geneem word.
Lizzy Suping, Opod-woordvoerder, sê die onafhanklike polisieondersoekdirektoraat (Opod) werk saam met lede van die taktiese reaksiespan om die twee oorblywende verdagtes op te spoor. Die voorval het in 2023 plaasgevind toe ‘n groep na bewering sonder ‘n deursoekingslasbrief ‘n huis deursoek en op edelstene ter waarde van net minder as R15 miljoen beslag gelê het.
Volgens Suping het die ondersoek aanvanklik ses verdagtes betrek. Drie was lede van die Ekurhuleni-metropolisie, een was ‘n lid van die Gautengse verkeerspolisie, een van die Johannesburgse metropolisie en die sesde was ‘n sakeman wat hom glo as ‘n polisiebeampte voorgedoen het tydens die klopjag. Die sakeman is sedertdien oorlede.
Opod beweer die EMPD-beamptes het buite hul regsgebied opgetree en nie die edelstene volgens die voorgeskrewe prosedures by die polisie in die SAPD 10 – Voorvalleboek geregistreer nie. Van die edelstene is glo later in die voertuig van een van die EMPD-beamptes aangetref. Die Gautengse verkeersbeampte en die JMPD-beampte het volgens Opod ook geen bevoegdheid gehad om so ‘n strafregtelike ondersoek uit te voer nie.
Die verdagte wat reeds aangekeer is, word by die Edenvale-aanhoudingselle aangehou en sal na verwagting Maandag in die Johannesburgse landdroshof verskyn.
