KWAZULU-NATAL. – ’n Vrou (32) wat in Durban as vermis aangemeld is, is later ongedeerd in haar eie huis aan die slaap gevind.
Reaction Unit South Africa (Rusa) het bevestig dat die vrou deur haar familie as vermis aangemeld is nadat sy nie op boodskappe gereageer het nie. Toe sy uiteindelik later antwoord, het haar stem “vreemd geklink”. Die familie het aanvanklik die noodorganisasie gekontak en haar besonderhede is ook op sosiale media versprei, waarna reaksiespanne begin het om na haar te soek.
Kort daarna het die familie bevestig sy is veilig in haar bed in eThekwini aangetref. Sy het glo geslaap en nie op boodskappe gereageer nie, wat tot die misverstand gelei het.
Rusa sê die voorval wys hoe vinnig paniek kan ontstaan wanneer iemand nie dadelik bereik kan word nie, veral wanneer kommunikasie verkeerd geïnterpreteer word.
