FILIPPYNE. – ‘n Kragtige aardbewing van 7,8 op die Richterskaal het vanoggend die suidelike Filippyne geskud. Minstens 19 mense is dood en meer as 200 beseer terwyl duisende inwoners dakloos gelaat is. Die ramp het op die eerste skooldag van die nuwe akademiese jaar plaasgevind terwyl leerlinge buite vir ‘n vlagseremonie aangetree het.
Die aardbewing het volgens die Amerikaanse Geologiese Opname (USGS) op ‘n diepte van sowat 35 kilometer in die see voorgekom. Die episentrum was voor die kus van die Sarangani-provinsie, ongeveer 26 kilometer suidwes van Kablalan – die sterkste aardbewing wat die land sedert 1990 getref het. General Santos, ‘n stad met 722 000 inwoners in die suide van Mindanao, het van die ernstigste skade gely. Dele van die St. Elizabeth-hospitaal is swaar beskadig. n Winkelsentrum met ‘n Jollibee-restaurant is in puin verander, terwyl ‘n skoolgebou wat volgens beamptes leeg was, inmekaargesak het. Geen beserings is by die skole aangemeld nie.
‘n Tsoenamiwaarskuwing is ná die skok uitgereik, maar die Stille Oseaan-tsoenamiwaarskuwingsentrum het sowat vyf uur later bevestig dat die gevaar grotendeels verby was. Filippynse owerhede het die waarskuwing teen die middag opgehef. Kragtige naskokke het die gebied vanaf sowat twee uur ná die eerste skudding getref, met die grootste wat 6,5 op die Richterskaal gemeet het.
President Ferdinand Marcos jr. het noodagentskappe geaktiveer en skole in geraakte gebiede gesluit.
Bronne: NPR, Al Jazeera, Wikipedia, CBS News, RNZ News, CNN
