MPUMALANGA. – Vier mense is vanoggend (Sondag) in ’n ongeluk reg van voor op die N2 tussen eMkhondo en Pongola dood. Twee mans en ‘n vrou in ‘n sedan, sowel as ‘n voetganger, is op die toneel dood verklaar.
Moeti Mmusi, woordvoerder vir die departement van gemeenskapsveiligheid, sekuriteit en skakeling in die provinsie, sê die ongeluk het plaasgevind toe ’n bakkie en ’n sedan mekaar reg van voor getref het. Die bestuurder van die bakkie en ’n kind wat saam met hom in die voertuig was, het ernstige beserings opgedoen en is na die hospitaal in eMkhondo geneem.
’n Ondersoek na die presiese oorsaak van die ongeluk is aan die gang, maar owerhede sê dat roekelose bestuur nie uitgesluit kan word nie.
Jackie Macie, LUR vir dié departement, het motoriste gewaarsku om versigtig te wees, veral op besige roetes soos die N2. Hy het sy medelye betoon met die families van die oorledenes en die beseerdes spoedige herstel toegewens. Die name van die oorledenes sal bekend gemaak word sodra hul naasbestaandes in kennis gestel is.
