GAUTENG.- Twee voormalige werknemers van die Gautengse onderwysdepartement en nog ‘n medepligtige van buite die departement is Donderdag deur die Johannesburgse kommersiële misdaadhof, wat in die Palm Ridge-landdroshof vir bedrog, vervalsing en diefstal gevonnis. Die GDE het die vonnis verwelkom.
Steve Mabona, departementele woordvoerder, sê in ‘n verklaring die oortredings hou verband met ‘n spookwerker-skema wat die departement van ongeveer R3 miljoen beroof het. Die departement se interne risiko-ondersoek het die misdaad aan die lig gebring. Sewe werknemers van die menslikehulpbronne-eenheid by die Gauteng-Wes-distrikskantoor was by die skema betrokke. Betalings is aan nie-bestaande werknemers gegenereer en verwerk. Een van die voormalige werknemers is tot 10 jaar tronkstraf, waarvan vier jaar opgeskort is, gevonnis. Nog ‘n voormalige werknemer is tot agt jaar gevonnis. Die buite-departementele medepligtige is tot drie jaar, vir vyf jaar opgeskort, gevonnis.
LUR Matome Chiloane sê die uitspraak stuur ‘n sterk boodskap dat bedrog en korrupsie nie geduld sal word nie en beklemtoon die departement se verbintenis tot verantwoordelikheid en beskerming van openbare geld.
