Die voorgestelde Vredehoek City Improvement District (CID) in Kaapstad kort nog net 84 toestemmings van eiendomseienaars om die vereiste steun vir die inisiatief te bereik.
Volgens ’n opdatering van 11 November 2026 word eienaars van eiendom binne die voorgestelde gebied aangemoedig om hul formele toestemming of beswaar in te dien.
Minstens 60% van die betrokke eiendomseienaars wat vir die bykomende heffing aanspreeklik sal wees, moet die voorstel steun voordat ’n aansoek vir die instelling van die CID by die Stad Kaapstad ingedien kan word. Die aansoek moet daarna deur die stadsraad oorweeg word.
Die Stad het die loodskomitee se administratiewe sperdatum verleng. Die teikendatum om 60% te bereik, is nou 30 November 2026. Lees ook: Vredehoek-CID: Sperdatum verleng terwyl steun vir plan groei.
Wat die Vredehoek CID behels
Die voorgestelde CID sluit dele van Vredehoek en Devil’s Peak in en beoog om aanvullende dienste vir openbare veiligheid, skoonmaak, parke en openbare ruimtes, asook maatskaplike betrokkenheid, te ondersteun.
Dié dienste sal bestaande munisipale dienste aanvul en deur ’n bykomende heffing op kwalifiserende eiendomme binne die goedgekeurde gebied befonds word.
Vroeër vandeesweek het Nuusflits berig dat die Vredehoek CID minder as 100 steunverklarings kort.
Vredehoek CID: hoe om toestemmings in te dien
Eiendomseienaars kan hul toestemming of beswaar aanlyn indien. Hulle kan ook ’n vorm van die Vredehoek CID se stemblad aflaai en dit, saam met enige vereiste ondersteunende dokumente, aan [email protected] stuur.
Meer inligting oor die voorstel is op die Vredehoek CID-webwerf beskikbaar. Eiendomseienaars kan ook die voorgestelde gebied op ’n kaart nagaan of die vordering met toestemmings volg.
