GAUTENG. – ‘n Vroulike werknemer van Harmony Gold Mining Company het Sondag ná ‘n voorval by die TauTona-diensskag naby Carletonville gesterf.
Chipo Morapedi-Mrara, hoof van kommunikasie by Harmony, sê die departement van minerale en petroleumhulpbronne (DMPR) en ander betrokke rolspelers is van die voorval in kennis gestel. Die maatskappy bied ook ondersteuning aan die oorledene se familie en haar kollegas.
Harmony se uitvoerende hoof, Beyers Nel, het sy medelye met die oorledene se familie, vriende en kollegas uitgespreek. Hy sê die maatskappy werk saam met die DMPR en ander rolspelers om vas te stel wat tot die voorval gelei het, sodat die nodige lesse geleer en veiligheidsmaatreëls verder versterk kan word om soortgelyke voorvalle in die toekoms te voorkom.
Die oorsaak van die voorval word ondersoek.
