OOS-KAAP. – ‘n 30-jarige vrou is verlede Donderdag in Johannesburg in hegtenis geneem in verband met beweerde mensehandel wat deur die Valke ondersoek word. Sy word van mensehandel en die kommersiële seksuele uitbuiting van vroue aangekla en sal vandag in die KuGompo-landdroshof verskyn.
AO Ndiphiwe Mhlakuvana, Valke-woordvoerder, sê die saak het sy oorsprong in 2023 toe die Valke inligting ontvang het dat ‘n woonperseel in die Quigney-woonbuurt van KuGompo as ‘n bordeel gebruik word. Verdere ondersoek het getoon dat jong vroue uit verskeie dele van die Oos-Kaap na bewering gewerf en onder dwang vir prostitusie uitgebuit is. Die vrou wat nou in hegtenis is, is deur die ondersoekspan aan die saak gekoppel, wat reeds die 52-jarige Vuyokazi Gana ingesluit het.
Vuyokazi Gana (52), die adjunkhoof van ’n laerskool, is op 15 Oktober 2025 op aanklagte van mensehandel en prostitusie, wat jong vroue uit die voormalige Transkei betrek het, in hegtenis geneem.
