Inwoners van verskeie dele van die land word gewaarsku om voor te berei vir baie koue, nat en gevaarlike weerstoestande wat na verwagting van vandag tot Donderdag groot dele van die Oos-Kaap, KwaZulu-Natal, Lesotho en die suidelike Vrystaat sal tref.
Volgens Vox Weather en die Suid-Afrikaanse Weerdiens (SAWD) sal ‘n afsnylaagdrukstelsel, saam met ‘n sterk hoogdrukstelsel, wydverspreide reën, donderbuie en swaar sneeu veroorsaak.
Die SAWD het ‘n Oranje Vlak 6-waarskuwing vir ontwrigtende reën uitgereik vir gebiede langs die kus en aangrensende binneland tussen Oos-Londen en Port Edward. Oorstromings van brûe, paaie en nedersettings, asook skade aan eiendom en infrastruktuur, word verwag.
‘n Oranje Vlak 5-waarskuwing is ook van krag vir ontwrigtende sneeu oor die noordoostelike hooglande van die Oos-Kaap. Die sneeu kan verkeersontwrigtings, onderbrekings van noodsaaklike dienste en die tydelike afsny van sommige gemeenskappe veroorsaak.
Verder geld Geel Vlak 4- en Geel Vlak 2-waarskuwings vir dele van KwaZulu-Natal en die Oos-Kaap waar verdere swaar reën en plaaslike oorstromings moontlik is. ‘n Geel Vlak 1-waarskuwing vir sterk kuswinde en ruwe seetoestande is ook uitgereik vir die kus tussen Kaap Columbine en Kaap Agulhas.
Weermodelle dui daarop dat sommige dele van die Ooskus tot 100 mm reën kan ontvang, veral tussen Oos-Londen en suid van Durban, wat die risiko vir grootskaalse oorstromings verhoog.
Swaar sneeu van tussen 25 cm en 35 cm word Woensdag oor die noordoostelike Oos-Kaap en Lesotho verwag, terwyl plaaslike ophopings van tot 40 cm moontlik is. Reën en sneeu kan ook oor dele van die suidelike Vrystaat voorkom.
Motoriste word aangeraai om hul reisplanne aan te pas, weerwaarskuwings dop te hou en nie oor oorstroomde paaie of brûe te ry nie.
