GAUTENG. – Motoriste word gewaarsku oor ’n toename in voorvalle van skerpgemaakte ysterpenne (spiking) op verskeie hoofroetes in en rondom Pretoria, hoofsaaklik in die nag.
Shaun Schutte, direkteur van Black Knight Bodyguards, sê die situasie is nie meer bloot ’n waarskuwing nie, maar ’n herhalende en voorspelbare patroon waar voorwerpe doelbewus op die pad geplaas word om voertuie te laat stop. Volgens inligting is onlangse voorvalle op die R21 net ná die N1 Flying Saucer-wisselaar en op die N4 oostwaarts tussen Silverlakes en Donkerhoek aangemeld, waar voertuie deur klippe en ander voorwerpe getref is. Dit volg ná vroeëre dodelike voorvalle op die N1 naby Hammanskraal, waar soortgelyke aanvalle glo in gewapende rooftogte en sterftes geëskaleer het. Die probleempunte sluit onder meer die N4-korridor (Bronkhorstspruit, Balmoral en Brits), die N1 tussen Midrand en Carousel, die R80 Mabopane-snelweg, die R566 en verskeie ander hoofroetes in die Pretoria-gebied in.
Die aanvalle vind glo meestal tussen 22:00 en 03:00 plaas en volg ’n herhalende patroon; voorwerpe word op die pad geplaas, voertuie raak beskadig en bestuurders word gedwing om te stop, waarna aanvalle volg. Motoriste word versoek om nie op die toneel te stop indien hul voertuig beskadig word nie, maar eerder beheer te behou, stadig snelheid te verminder en na ’n veilige, goed beligte plek soos ’n vulstasie of polisiestasie te ry. Schutte sê die patroon dui op ’n georganiseerde en herhalende probleem. Beperkte ingryping vind tans plaa, terwyl motoriste die risiko grootliks self moet bestuur.
