KWAZULU-NATAL. – ‘n Vrou is Sondagaand in ‘n skietvoorval in Durban-Noord dood, terwyl ‘n afleweringsmotorfietsryer en ‘n kind ook beseer is.
Garrith Jamieson van ALS Paramedics sê nooddienste is kort ná 17:30 na Blackburnweg, naby Parkweg, ontbied. Met hul aankoms was die polisie en verskeie veiligheidsbeamptes reeds op die toneel en die pad is afgesper. Paramedici het ‘n voertuig met verskeie koeëlgate aangetref.
In die voertuig was ‘n vrou, vermoedelik in haar veertigs, wat veelvuldige skietwonde opgedoen het. Sy is op die toneel dood verklaar. Volgens Jamieson is ‘n afleweringsmotorfietsryer ook tydens die skietery getref, toe hy by die toneel verbygery het. Hy is op die toneel gestabiliseer en na ‘n nabygeleë hospitaal vervoer vir verdere behandeling. ‘n Kind het geringe beserings opgedoen en is ook na ‘n hospitaal geneem.
Die polisie het die toneel vir etlike ure afgesper terwyl ondersoekbeamptes hul werk gedoen het. Die omstandighede van die skietery is nog onbekend en word ondersoek.
Tyron Powell van Marshall Security sê met aankoms het hulle ‘n vrou met veelvuldige skietwonde in haar voertuig aangetref. Sy is op die toneel dood verklaar. ‘n Kind, wat ook in die voertuig was, het geen fisieke beserings opgedoen nie, maar is volgens Powell erg getraumatiseer deur die voorval. ‘n Motorfietsryer is tydens die skietery deur koeëls getref en is deur Netcare 911 op die toneel behandel voordat hy na ‘n hospitaal vervoer is.
