KWAZULU-NATAL. – ’n 12-jarige meisie is vroeg Donderdagoggend tydens ’n gewapende huisroof in Osindisweni met ’n vuurwapen aangehou toe vier gewapende mans glo ‘n woning binnegedring het.
Volgens Reaction Unit South Africa (Rusa) het die voorval kort voor 04:00 plaasgevind. Nooddienste is na die toneel ontbied nadat berig van ‘n huisroof ontvang is. Met hul aankoms het beamptes die kind se 53-jarige tante onder ’n bed in die huis aangetref, terwyl die verdagtes reeds van die toneel gevlug het.
Die meisie het aan owerhede vertel dat sy geslaap het toe die mans deur die hek en ’n skuifdeur toegang tot die huis verkry het. Sy is met ’n vuurwapen gedreig en ondervra oor geld, ’n kluis en waardevolle items in die huis. Die verdagtes het die huis deursoek en uiteindelik met ’n televisie gevlug nadat geen kontant of kluis in die huis gevind is nie.
Albei slagoffers is erg getraumatiseer deur die voorval, alhoewel hulle nie fisiese beserings opgedoen het nie. Hulle het aangedui dat hulle ’n saak by die polisie gaan open.
