GAUTENG. – Altesaam 12 senior polisiebeamptes en ’n maatskappydirekteur is in hegtenis geneem in verband met beweerde korrupsie in die toeken van ’n tender van R360 miljoen aan Medicare 24.
Henry Mamothame, woordvoerder van die NVG se ondersoekdirektoraat teen korrupsie (IDAC), het bevestig dat die inhegtenisnemings verband hou met die beweerde onreëlmatige toekenning van die tender. Die beskuldigdes sal binnekort hul eerste verskyning op aanklagte van korrupsie, bedrog en oortredings van die Wet op Openbare Finansiële Bestuur (PFMA) maak.
Brig. Athlenda Mathe, die polisie se nasionale woordvoerder, is tans op pad na die Pretoria-Sentraal-landdroshof om die hofverrigtinge by te woon. Meer besonderhede sal bekend gemaak word sodra dit beskikbaar is.
Nuusflits het voorheen berig, dat die departement van openbare werke en infrastruktuur ’n huurkontrak met Medicare 24 Tshwane-distrik beëindig het, ná ernstige bewerings oor hoe die kontrak toegeken is. Dit is ‘n maatskappy wat glo aan Vusimuzi “Cat” Matlala verbind word en hou verband met ’n hospitaalfasiliteit in Pretoria-Wes. ’n Interne ondersoek bevind dat die huurkontrak nie regmatig in werking kon tree nie, aangesien die betrokke hospitaalfasiliteit nooit deur die polisie as surplus verklaar is nie. Ingevolge die Wet op Bestuur van Regerings- Onroerende Bates van 2007 bly die SAPD die aangewese gebruiker van die eiendom.
