VRYSTAAT. – Twee verdagtes is in hegtenis geneem ná ’n reeks gewapende rooftogte in Bloemfontein waarin slagoffers deur insittendes van ’n BMW geteiken is. Die polisie glo die verdagtes kan met nog sake in die Mangaung-omgewing verbind word en doen ’n beroep op moontlike slagoffers om na vore te kom.
Sers. Mahlomola Kareli sê die inhegtenisnemings volg ná verskeie voorvalle op 8 April waar slagoffers op verskillende plekke in die stad beroof is. In een geval is ’n 56-jarige man glo vroegoggend by sy woning oorval en van sy selfoon beroof. Later dieselfde dag is ’n 38-jarige man na bewering op pad werk toe met ’n vuurwapen gedreig en beroof. In nog ’n voorval het twee susters ’n saamrygeleentheid in ’n BMW aanvaar. Die bestuurder het egter langs die pad gestop, waarna hy en ’n passasier glo die vroue met ’n mes en ’n vuurwapen gedreig en van hul besittings beroof het voordat hulle in die donker agtergelaat is.
Die Bloemfonteinse blitspatrollie het later tydens patrollies ’n BMW wat by die beskrywings pas, opgemerk. In samewerking met ‘n private veiligheidsdiens is die motor op die N1 voorgekeer. Tydens ’n deursoeking van die BMW en die twee mans, is dwelms soos Mandrax en kristalmetamfetamien, twee messe en ’n replika-vuurwapen gevind. Vermoedelik gesteelde items, insluitend selfone, bankkaarte en identiteitsdokumente, is ook teruggevind.
Die twee mans sal binnekort op aanklagte wat gewapende roof, besit van vermoedelik gesteelde goedere en onwettige dwelms insluit, in die Bloemfontein-landdroshof verskyn.
