GAUTENG. – Twee verdagtes is dood nadat ’n skietgeveg tussen hulle en die polisie in Reiger Park uitgebreek het. Owerhede het hul veldtog teen gewelddadige rooftogte en kapings verskerp.
Volgens polisiewoordvoerder, kol. Dimakatso Nevhuhulwi, het verskeie wetstoepassingsagentskappe Maandag betroubare inligting ontvang oor ’n groep verdagtes wat glo by kapings van vragmotors en koerierbakkies betrokke is. Volgens die polisie is ’n verdagte voertuig in Boksburg opgemerk, maar toe beamptes dit wou stop, het die bestuurder weggejaag. Dit het tot ’n hoëspoedjaagtog gelei wat later in ’n skietgeveg ontaard het. Die voertuig het uiteindelik naby ’n informele nedersetting tot stilstand gekom. Twee van die insittendes het te voet gevlug, terwyl die ander twee in die voertuig doodgeskiet is. Twee onwettige vuurwapens en ’n Mazda is op die toneel gevind. Verdere ondersoeke het die polisie na ’n huis in Germiston gelei wat vermoedelik as skuilplek gebruik is. Daar is ’n gesteelde Chevrolet Captiva, wat met ’n roofsaak in Booysens verbind word, asook verskeie vals nommerplate gekry.
Een van die polisievoertuie is tydens die voorval deur koeëls getref en beskadig, maar geen beamptes is beseer nie. Die betrokke lede sal egter ondersteuning en berading ontvang. Die ondersoek duur voort om vas te stel of die verdagtes by ander misdade betrokke was.
Lt.genl. Tommy Mthombeni, die provinsiale polisiekommissaris, het die span vir hul vinnige optrede en samewerking geloof. Hy het ook die publiek bedank vir hul inligting, wat volgens hom ’n groot rol speel in die bekamping van misdaad.
