GAUTENG. – Vier verdagtes tussen 22 en 26 jaar is in hegtenis geneem nadat drie ongelisensieerde vuurwapens, ammunisie en ’n voertuig wat na bewering gekaap is, tydens ’n multidissiplinêre operasie in Danville, Pretoria-Wes, gevind is.
Kapt. Tintswalo Sibeko, polisiewoordvoerder, sê die operasie is Woensdag uitgevoer. Die polisie het ’n Nissan Micra onderskep wat vermoedelik in ernstige en geweldsmisdade gebruik is. Al vier insittendes is in hegtenis geneem.
Tydens ’n deursoeking van die voertuig is drie ongelisensieerde vuurwapens, ammunisie, vals nommerplate, gevlekte geld en selfone gevind. Die voertuig is ook vir verdere ondersoek gekonfiskeer. ‘n Ondersoek duur voort om vas te stel of hulle met ander ernstige en geweldsmisdade verbind kan word.
Die vier verdagtes sal na verwagting vandag in die Pretoria-landdroshof voorkom.
