GAUTENG. – Altesaam vyf verdagtes sal Maandag op aanklagte van beweerde oortreding van die wet op buitelandse militêre bystand, vir die Rusland/Oekraïne-konflik, in die Kempton Park-landdroshof verskyn. Vier verdagtes is aanvanklik Vrydag op OR Tambo Internasionale Lughawe (Ortia) in hegtenis geneem, maar nog ‘n verdagte is intussen in aanhouding.
Luidens ‘n verklaring deur kol. Katlego Mogale is ‘n lopende ondersoek aan die gang na die beweerde fasilitering van verskeie Suid-Afrikaners se betrokkenheid by die Rusland/Oekraïne-konflik. Voorlopige ondersoek dui op ‘n vroulike verdagte, ‘n SA-burger, wat die reis en werwing van individue na die Russiese Federasie Weermag gefasiliteer het. Ortia-polisiebeamptes het die vier aangehoudenes as verdag beskou toe hulle deur die Verenigde Arabiese Emirate na Rusland wou reis. Hulle is van die vertrekhek verwyder en na die Valke verwys, waarna hulle deur die eenheid ir misdade teen die staat in aanhouding geneem is.
’n Deursoekings-en-beslagleggingsbevel is bekom vir nog ‘n verdagte wat vermoedelik by die fasilitering van die vier, sowel as ’n vyfde persoon wat reeds na Rusland vertrek het, betrokke was. Mogale sê dié verdagte individu is Donderdag by Ortia ondervra en in aanhouding geplaas, waartydens verdere bewyse aan die lig gekom het. Dit het tot Vrydag se inhegtenisneming van nog drie mans gelei. Die Valke het op elektronieste toestelle en rugsakke beslag gelê wat deel van die ondersoek is.
Verdere skakeling met plaaslike, sowel as internasionale intelligensie, duur voort om vas te stel wat die volle omvang van die beweerde netwerk en moontlike veiliheidsimplikasies is.
