SUID-AFRIKA. – SA Netbal het gister Jenny van Dyk as die nuwe hoofafrigter van die SPAR Protea-netbalspan aangekondig. Sy volg Norma Plummer op. Plummer het einde Desember 2023 uitgetree. Zanele Mdodana is as hulpafrigter aangewys.
Cecilia Molokwane, president van SA Netbal, is oortuig Van Dyk is die mees geskikte kandidaat. Van Dyk het ’n vier jaar kontrak geteken en sal die span na die 2027-netbalwêreldbekertoernooi in Australië vergesel.
Van Dyk was vroeër die afrigter van die Universiteit van Pretoria se netbalspan. Hulle het onder haar leiding verskeie kere die finale rondte in die Varsity-beker behaal. Voor haar huidige aanstelling was sy by die O/21-Proteaspan betrokke.
Volgens Van Dyk moet Suid-Afrika ’n netbalkultuur ontwikkel en voel sy geëerd om die verantwoordelikheid van die span op haar skouers te hê.
Bronne: Netball SA, SuperSport
