WINDHOEK, NAMIBIË. – Wentzel Maasdorp is Dinsdagmiddag in die Windhoek-sakekern aangekeer nadat ’n uitgebreide soektog na hom van stapel gestuur is. Hy is in verband met die moord op Delia Maasdorp, asook diefstal, in hegtenis geneem.
Delia Maasdorp se liggaam is Sondag in haar woonstel toegedraai in komberse ontdek. Verskeie items insluitend haar televisiestel en blou BMW was weg.
Volgens adj. kom. Kauna Shikwambi is Wentzel aangekeer toe hy ’n rygeleentheid na Rehoboth gesoek het. Delia se BMW is vroeër Dinsdag by ’n petrolstasie op Rundu aangetref.
The Namibian berig Delia en Wentzel was in ’n romantiese verhouding. Wentzel is verwant aan haar eksman, adv. Ramon Maasdorp.
Die verdagte sal na verwagting vandag in die hof verskyn.
Bronne: The Namibian, Windhoek Observer
