WES-KAAP. – Nico Snyman wat in 2014 aan die Hoërskool Bethlehem Voortrekker gematrikuleer het, se liggaam is Saterdag met ‘n skietwond in ‘n straat in Bellville aangetref.
AO Joseph Swartbooi sê die polisie het in die vroeë oggendure op ‘n klagte reageer.
“Met hul aankoms in Northumberlandstraat is die liggaam van ‘n man gevind, wat ‘n skietwond opgedoen het.”
Die man is op die toneel dood verklaar. ‘n Onbekende verdagte het van die toneel gevlug.
“Die motief vir hierdie aanval is ‘n argument.”
Swartbooi sê aan Nuusflits die omstandighede van die insident word in ‘n moordsaak deur Bellville-polisie ondersoek. Enigiemand met inligting word gevra om die polisie te kontak.
BHVS 1902 in Bethlehem waar Snyman in 2014 gematrikuleer het, het op hulle Facebook-blad medelye uitgespreek:
Alumni-nuus:
Hiermee betuig ons as Voortrekkerfamilie ons innige meegevoel aan Nico Snyman (Klas van 2014) se familie na sy tragiese afsterwe.
