OOS-KAAP. – ‘n Potensiële bedreiging vir skoolveiligheid is afgeweer toe ‘n gr. 11-leerling (20) Woensdag in Majola, Port St. Johns, op aanklag van die besit van ‘n ongelisensieerde vuurwapen in hegtenis geneem is.
Kapt. Welile Matyolo sê Majola-polisie is Dinsdagaand na die woonplek van ‘n leerling in Ngxongweni, Luthengele, nadat inligting ontvang is. Tydens deursoeking van die leerling se kamer is op ‘n 9 mm-pistool met ‘n reeksnommer, maar sonder ammunisie, afgekom. Die leerling, oorspronklik van Swazini, is dadelik in hegtenis geneem.
Matyolo sê die polisie ondersoek hoe die leerling in die besit van die vuurwapen gekom het en probeer die wettige eienaar opspoor.
Die leerling het Donderdag op aanklag van die onwettige besit van ‘n ongelisensieerde vuurwapen in die Port St. Johns-landdroshof voorgekom.
