MPUMALANGA. – ‘n Meisie (16) wat verlede week beweer dat sy verkrag is nadat sy geduimry het, is van meineed aangekla. Ondersoeke het glo aan die lig gebring dat sy die beweerde voorval gefabriseer het.
Lt.kol. Jabu Ndubane, provinsiale polisiewoordvoerder, sê die klagte van verkragting het wye openbare aandag getrek. Die eenheid vir gesinsgeweld, kinderbeskerming en seksuele misdade het dadelik ‘n ondersoek van stapel gestuur. Die meisie het glo later erken dat sy ’n manlike vriend besoek het en uit vrees vir haar ouers se reaksie oor ‘n verkragting gelieg het.
Ndubane sê in die meisie se oorspronklike verklaring het sy beweer dat sy van Dullstroom na Lydenburg geduimry het. ‘n Swart VW Polo met twee Engelssprekendes het haar glo ‘n geleentheid aangebied. Sy het beweer dat die bestuurder ná Coromandel van die hoofpad na ‘n afgeleë plek afgedraai het. Sy is glo daarna met ‘n lap met ‘n chemiese reuk bewusteloos gemaak. Sy het wakker geword terwyl ‘n passasier haar verkrag het en het geld geweier wat hy haar aangebied het. Volgens ondersoekbeamptes is hierdie bewerings vals bevind.
Genl.maj. (Dr.) Zeph Mkhwanazi het gesê, “Ons sal geen genade hê vir individue wat vals sake aanhangig maak nie. Die misdaadstatistieke vir die laaste kwartaal van 2024/2025 toon ’n toename in seksuele oortredings. Dit is dus uiters kommerwekkend en ontmoedigend wanneer mense die stelsel misbruik deur vals sake aan te meld. Hierdie optrede mors polisiehulpmiddele en ondermyn die pogings om geslagsgebaseerde geweld te beveg, wat vir ons ’n topprioriteit is. Valse klagtes is ’n belediging vir werklike slagoffers, wat egte lyding ervaar en ons ondersteuning benodig. Ons doen ’n beroep op die publiek om eerlik met ons saam te werk. Enigiemand wat vals inligting verskaf, sal aangekla word. Ons sal nie huiwer om ’n voorbeeld te maak van sulke individue nie.”
Het jy kommentaar oor die berig? Jy kan nou aan Nuusflits lesersbriewe skryf en dalk word joune gepubliseer. Rig jou brief aan die redakteur by [email protected]
