GAUTENG. – ’n Kind (6) is Sondagaand dood nadat ’n brand by drie shacks in Uitbreiding 6, Mamelodi-Oos, uitgebreek het.
Lindsay Mnguni, woordvoerder vir die Stad Tshwane se nooddienste, sê in ‘n verklaring die brand is omstreeks 21:30 by die noodkommunikasiesentrum aangemeld. Brandbestrydingseenhede, insluitend ’n watertenkvoertuig en ’n bosbrandvoertuig, is onmiddellik vanaf die Mamelodi-brandweerstasie na die toneel ontbied.
Met aankoms het brandbestryders drie shacks aan die brand gevind. Hulle kon daarin slaag om die brand te keer voordat dit al drie eenhede verwoes het. Ook kon hulle die hoofhuis en een van die shacks beskerm. Die liggaam van ‘n 6-jarige kind, wat noodlottige brandwonde opgedoen het, is in een van die shacks aangetref. Ses ander inwoners het die brand oorleef, insluitend ’n kind wat geringe brandwonde opgedoen het. Die kind is op die toneel behandel en daarna per ambulans na die Stanza Bopape-kliniek vervoer.
Gemeenskapsleiers, die polisie en ander rolspelers was ook op die toneel en het gehelp met die hantering van die voorval.
Die oorsaak van die brand is nog onbekend en sal verder ondersoek word.
