MPUMALANGA. – ‘n Plaaseienaar (39) is Vrydag in die vroeë oggendure met ‘n steekwond in die nek aangetref, terwyl ‘n verdagte op die toneel ‘n skietwond in die regterdy gehad het.
Sers. Thulisile Magagula, polisiewoordvoerder, sê die polisie en nooddienste is na ‘n plaasaanval in aanvang ontbied. Volgens die slagoffer het hy opgemerk die plaas se heinings is gesny, waarna hy dit gaan inspekteer het. Hy is toe skielik deur twee verdagtes aangeval, waarna een hom in die nek gesteek het. Hy het daarin geslaag om een aanvaller uit selfverdediging te skiet, maar die tweede het te voet gevlug.
Magagula sê ‘n Malawiese burger (46) is ná die voorval in hegtenis geneem. Hy staan op aanklagte van poging tot moord, veediefstal en die oortreding van die immigrasiewet tereg. Beide die slagoffer en die beseerde verdagte is vir mediese behandeling na ‘n hospitaal vervoer. Die verdagte is onder polisiebewaking geplaas en aangekla. Hy sal sodra hy medies geskik verklaar word in die Ermelo-landdroshof verskyn. Meer aanklagte kan nie uitgesluit word nie.
Voorlopige ondersoeke het aan die lig gebring dat die tweede verdagte, wat gevlug het, tans op borgtog is en in ander sake in Carolina en Chrissiesmeer aangekla is.
