LIMPOPO. – ‘n Polisiesersant (53) van Riba Cross, Burgersfort, het glo Sondag sy eie lewe geneem nadat hy deur die polisie op die R555-pad naby Burgersfort vasgekeer is. Die voorval volg nadat hy in Gauteng vir moord en poging tot moord, wat glo met huishoudelike geweld verband hou, gesoek is.
Kol. Malesela Ledwaba, polisiewoordvoerder, sê in ‘n verklaring die oorledene was verbonde aan die Presidensiële Beskermingsdiens (PSS) in Pretoria. Hy het glo Saterdag ‘n vroulike sersant van Pretoria doodgeskiet en daarna gevlug. Hy het die volgende oggend glo sy eie vrou in Bronkhorstspruit geskiet en gewond.
Polisie in Limpopo het ‘n wenk van die wit Nissan wat deur die sersant bestuur is, ontvang en dit onderskep. Die vasgekeerde sersant het glo op die beamptes geskiet en daarna, terwyl hy in die bakkie was, die vuurwapen op homself gerig. Dis bevestig die wapen wat gebruik is, is ’n diensvuurwapen van die staat.
‘n Geregtelike doodsondersoek is geopen en Opod is vir verdere ondersoek van die voorval in kennis gestel.
Lt.genl. Thembi Hadebe, die provinsiale polisiekommissaris, het die voorval ten sterkste veroordeel en haar kommer uitgespreek oor die voortgesette verlies aan lewens weens huishoudelike geweld, veral waar wetstoepassers betrokke is.
