GAUTENG. – Die departement van gesondheid waarsku verbruikers om ekstra waaksaam te wees wanneer hulle Black Friday-aankope doen, veral wanneer dit by voedselprodukte kom. Die departement sê kopers moet gehalte en veiligheid bo prys en hoeveelheid stel om te voorkom dat ongewenste produkte in hulle inkopiemandjie beland.
Volgens die departement moet verbruikers sorgvuldig na voedsel-etikette en vervaldatums kyk om die risiko van moontlike voedselvergiftiging te beperk. Die departement raai verder aan dat geen voedselitems met beskadigde, gebreekte of lekkende verpakking gekoop moet word nie, selfs al lyk of ruik dit aanvaarbaar.
Die departement waarsku dat die gebruik van vervalste of vervalde voedsel ernstige gesondheidsrisiko’s en langtermyn-komplikasies kan inhou.
