GAUTENG. – President Cyril Ramaphosa het die bedanking van adv. Andrea Johnson as hoof van die Nasionale Vervolgingsgesag se gespesialiseerde eenheid, ondersoekdirektoraat teen korrupsie (Idac), met onmiddellike effek aanvaar.
Vincent Magwenya, woordvoerder van die presidensie, sê die president het Johnson se versoek ingevolge die bepalings van die wet op die nasionale vervolgingsgesag toegestaan. Die besluit volg nadat Mmamoloko Kubayi, die minister van justisie en staatkundige ontwikkeling, aanbeveel het dat haar versoek goedgekeur word. Die aanbeveling is deur adv. Andy Mothibi, die nasionale direkteur van openbare vervolgings, ondersteun. Johnson het haar versoek om onmiddellik uit haar pos onthef te word aan beide Mothibi en president Ramaphosa gerig.
Ramaphosa het Johnson vir haar jare lange diens aan die Nasionale Vervolgingsgesag en haar bydrae as hoof van Idac bedank . Hy het ook sy vertroue in die Nasionale Vervolgingsgesag herbevestig en gesê die regering sal die instelling en sy personeel steeds ondersteun in hul pogings om misdaad en korrupsie te bekamp.
