GAUTENG. – Altesaam 310 verdagtes is Vrydag en Saterdag in polisie-optredes wat padblokkades, voertuig- en persoonsdeursoeking insluit, in hegtenis geneem. Tydens die Tshwane-distriksoperasies in die Wonderboompoort- en Pretoria-Noord-polisiëringsareas is verdagtes in hegtenis geneem nadat 600 persone en 289 voertuie deursoek is.
Kapt. Johan van Dyk sê aan Nuusflits ‘n verdere 15 voertuie is nagegaan om te verseker dat hulle nie gesteel is nie. Aan die begin van die operasie Vrydagaand het speurders altesaam 254 verdagtes opgespoor en in hegtenis geneem – onder andere vyf wat vir diefstal gesoek is, 21 vir opsetlike saakbeskadinging, ses vir gewapende rooftogte en vyf vir verkragting. ‘n Verdere 75 verdagtes is in verband met geslagsgebaseerde geweld in hegtenis geneem.
Die hoogtepunt van hierdie Operasie Shanela is Saterdagaand deur genl.maj. Samuel Thine, die Tshwane-polisiedistrikskommissaris gelei, saam met binnelandse sake, Tshwane-metropolisie, die departement van gemeenskapsveiligheid, korrektiewe dienste en plaaslike gemeenskapspolisiëringsforums. Hoësigbaarheidvoertuig- en voetpatrollies is met padblokkades en inspeksies uitgevoer. Inspeksie is by tien drankwinkels afgelê. Een is weens die oortreding van die drankwet gesluit. Boetes is opgelê en daar is op 481 570 ml alkohol beslag gelê. Voorts is nege spazawinkels besoek. Verkeersowerhede het 28 Aarto-oortredingskennisgewings van R16 500 vir oortreding van die padverkeerswet uitgereik.
Patrollies in tien probleemareas het ook dwelmverwante bedrywighede geïdentifiseer. Twee verdagtes is vir dwelmbesit in hegtenis geneem, terwyl daar op dwelms beslag gelê is. Altesaam 37 onwettige immigrante is in hegtenis geneem en aan immigrasiebeamptes oorhandig.
