Die departement van gesondheid het op Kersdag aangekondig 714 babas is tussen middernag op 24 Desember en die middag van 25 Desember in openbare gesondheidsfasiliteite regoor die land gebore. Die aankondiging wat in Pretoria gemaak is, sluit syfers vir al nege provinsies in. Meer as 30 tienerma’s, sommige so jonk as 15 jaar, is deel van dié statisitieke.
Volgens die departement is die eerste Kersdag-baba om 00:00 by Elim-hospitaal in Limpopo gebore, gevolg deur geboortes by Tonga-hospitaal in Mpumalanga en Elizabeth Ross-distrikshospitaal in die Vrystaat om 00:02. Die departement sê gesondheidswerkers het deurgaans toesig gehou om die veiligheid van moeders en pasgeborenes te verseker.
Die departement het ouers aangemoedig om te borsvoed en hulle babas te laat immuniseer, aangesien dit babas teen voorkombare siektes beskerm en oorlewing in die eerste lewensmaande bevorder. Die departement gaan voort om moeder-, neonatale en kindergesondheidsdienste te versterk om veilige en gehalte sorg te verseker.
Volgens die departement is die syfers voorlopig en kan dit verander namate verdere geboortes deur die dag aangemeld word.
Oos-Kaap – babaseuns 56 en babameisies 50
Gauteng – babaseuns 111 en babameisies 106
Vrystaat – babaseuns 14 en babameisies 18
Limpopo – babaseuns 53 en babameisies 35
KwaZulu-Natal – babaseuns 35 en babameisies 39
Mpumalanga – babaseuns 44 en babameisies 43
Noordwes – babaseuns 25 en babameisies 28
Noord-Kaap – babaseuns 14 en babameisies 11
Wes-Kaap – babaseuns 11 en babameisies 21
