OOS-KAAP. – ‘n Vrou (59) in Jeffreysbaai is deur die polisie in hegtenis geneem nadat ‘n kleutermeisie (2) wat in haar sorg was op Nuwejaar met oop wonde aan haar bolyf gevind is.
Luidens ‘n verklaring van brig. Nobuntu Gantana is die polisie omstreeks 04:00 na ‘n woning in Govan Mbeki-straat, Tokyo Sexwale, vir ‘n klagte van ‘n beseerde kind ontbied. Met aankoms het beamptes die meisie met oop wonde aan haar bolyf aangetref. Die kinderoppasser was glo onder die invloed van alkohol. Dit is tans onduidelik hoe die kind die beserings opgedoen het.
Die kind is na ’n hospitaal geneem waar sy vir mediese behandeling opgeneem is. Die verdagte sal na verwagting Maandag op aanklagte van aanranding met die opset om ernstig te beseer en kinderverwaarlosing in die Humansdorp-landdroshof voorkom.
