INTERNASIONAAL. – ’n ATR 42-500 turboprop-vliegtuig, bedryf deur Indonesia Air Transport, het Saterdag kontak met lugverkeerbeheer verloor, terwyl dit van Yogyakarta na Sultan Hasanuddin Internasionale Lughawe in Makassar onderweg was. Wrakstukke is Sondagoggend opgespoor. Die liggaam van een passasier is in die omgewing van die wrak gevind, terwyl 10 persone steeds vermis is.
Volgens Indonesiese soek-en-reddingsowerhede is die romp en ander wrakstukke Sondagoggend op ‘n helling van Mount Bulusaraung gevind. Die vliegtuig was op ’n missie vir die ministerie van marine- en vissery-aangeleenthede toe kontak verbreek is. Die romp- en stertgedeeltes is op die berghelling geïdentifiseer en reddingswerkers probeer steeds om die terrein te bereik en te ondersoek.
Lede van die gesamentlike soek-en-reddingspan het Sondagmiddag die liggaam van een van die passasiers op die terrein van die wrak gevind, ongeveer 200 meter in ’n kloof op, omring deur vliegtuigdebris. Daar word egter nog na sewe bemanningslede en drie passasiers in ‘n steil terrein en moeilike weerstoestande gesoek.
Bronne: Badan SAR Nasional Makassar, ANTARA News en CBC
