WES-KAAP. – Die DA sê 154 vuurwapens wat aan die polisie behoort, asook 205 vuurwapens van private veiligheidsmaatskappye, is oor ’n spesifieke tydperk in kriminele ondersoeke herwin nadat dit in die hande van misdadigers beland het.
Volgens Lisa Schickerling, DA-woordvoerder oor polisie, is die inligting verkry deur ’n parlementêre vraag aan die waarnemende minister van polisie. Die data dek die tydperk 1 April 2025 tot 31 Desember 2026. Die DA sê die feit dat so ’n groot aantal polisievuurwapens in misdaad gebruik word, dui op ernstige tekortkominge in beheer en toesig. Vrae word gestel oor hoe die wapens uit polisiebewaring verdwyn het. Die party eis dat beamptes verantwoordelik daarvoor waar nodig gedissiplineer word.
Die party het ook kommer uitgespreek oor die 205 vuurwapens van private veiligheidsmaatskappye wat later in kriminele sake opgeduik het. Psira (Reguleringsowerheid vir die Private Veiligheidsbedryf) word gevra om dringend op te tree en te verduidelik hoe dié wapens in die verkeerde hande beland.
Die DA sê die situasie ondermyn openbare vertroue in wetstoepassing en plaas ’n vraagteken oor die doeltreffendheid van huidige beheermeganismes rondom vuurwapens in beide die polisie en die veiligheidsbedryf.
